ВИДЕО:Промовирана насловната песна од филомот„Деца на сонцето“ од Влатко Стефановски
СКОПЈЕ / 6.11.13 / 01:03
Во МКЦ клубот вечерва беше промовиран видео спотот и песната „Деца на Сонцето“ од Влатко Стефановски, што е воедно и насловниот сонг од истоимениот игран филм на Антонио Митрикески, кој се снимаше летово на локации покрај крајбрежјето на Преспа.
Покрај оваа песна, како водечка, Стефановски ги потпишува и другите песни за саундтракот на филмот.
„Досега имам направено музика за 30тина филмови и секогаш се радувам кога добивам такви покани, но за македонски филм немам работено многу одамна уште од времето кога ја правев музиката за „Џипси меџик“ на Столе Попов. А тоа беше далечната 1997 година. Така што оваа понуда на режисерот Митрикески ми дојде како мелем на душа. Покрај сонгот, филмот ќе има и амбиентална музика, со оглед на прекрасниот
амбиент на Преспанското езеро, каде што филмот е сниман, а кое за мене беше право откровение. Ќе има и наменска музика за некои сцени“ изјави Стефановски.
Сонгот е рефлексија на неговите размисли за филмот и воопшто светот околу нас.
„Со оглед на моите години сум видел доста тоа, многу сум патувал, сум среќавал и обични и необични луѓе, сум бил сведок и на историски настани, промени, турбуленции, a моите мисли се обидуваат да го разберат светот и векот, да фатат смисла, за тоа каде и како се движиме напред или назад. Размислувам за вкусот на патлиџаните, пиперките и лубениците од пред десет-петнаесет години и овие сега. Размислувам за опстанокот, за желбите, за љубовта, за чувствата, заблудите, страдањата, за времето кое лета, размислувам за локалното и глобалното, за личното и општественото, за минливоста на животот и за траењето на уметноста... Со еден збор за се за кое жив човек размислува...“, вели Стефановски.
Филмот е во процес на монтажа, а се очекува да биде целосно готов кон почеток на март следната година.
Југословенскиот мајстор на монтажата и култна фигура од филмскиот еснаф, Андрија Зафрановиќ работи во моментов во Скопје на филмот и го монтира.
„Ова е филм правен со многу љубов и позитивна енергија, која екипата безрезервно ја даваше. И мислам дека тоа се чувствува во секоја сцена од филмот“ , изјави Митриќески.
Во филмот настапуваат Ивана Павлаковиќ, Кире Ѓоревски, Мето Јовановски, Владо Јовановски, Милица Стојанова, Билјана Таневски, Данчо Чеврески, Александар Микиќ, Сашко Коцев, Камка Тоциновски, Емир Хаџихафизбеговиќ...